ANAPEHren bisita CPAEN/NNPEKen ahaleginaren barruan kokatzen da, ostalaritza-establezimenduek tokiko nekazaritza-ekoizpen ekologikoaren aldeko apustua egin dezaten elikagaien hornitzaile gisa. Horretarako, oso tresna erabilgarria da Ekoalde, Nafarroako ekoizleen eta elaboratzaileen elkartea, era guztietako elikagaiak ematen baitizkie jantoki kolektiboei, Horeca kanalari, txikizkako merkataritzari eta kontsumo-taldeei. Nafarroako elikagai ekologikoak erosteko zerbitzu zentralizatua eskaintzen du, izen-abizenekin; beti jakingo dugu zein ekoizle eta zein herritatik datorren produktu bakoitza.

 

Aukera horretaz interesatuta, ANAPEHko   hainbat establezimenduk jardunaldian parte hartu zuten. Elkarteko ordezkaritzarekin batera, Mirian Otxotorena CPAEN/NNPEKeko presidentea eta Adrian Falagan Ekoaldeko merkataritza eta komunikazio arduraduna izan ziren. Otxotorenak ongi etorria eman zien bertaratuei, eta Nafarroako nekazaritza ekologikoaren egungo unea eta planteatzen zaizkion erronkak azaldu zizkien. Nafarroako elikagai ekologikoen eta zero kilometroaren aldeko apustua egitera eta erosketak Ekoalderen bidez egitera animatu zituen ostalariak.

 

Adrián Falaganek, bere aldetik, zehatz-mehatz kontatu zuen zein den Ekoalderen funtzionamendua. Erakunde horretan, eskaerak webgunearen bidez egiten dira, eta, ondoren, zuzenean kudeatzen dira ekoizleekin, harrera eta bidalketak egiten zaizkie establezimenduei, eta faktura taldekatu bakarra ematen zaie. Horrela, produktu ekologikoetarako sarbidea errazten da, enpresei eskaerak banan-banan eskatu behar izan gabe eta kudeaketa sinplifikatuz.

Iruñeko Galar tabernako Pedro Alonso ostalariak elikagai ekologikoekin egindako bazkari batekin amaitu zen hitzordua.

 

Ekoalderekin harremanetan jarri nahi duten ostalariek helbide honetara idatz diezaiokete Adrian Falagani: info@ekoalde.org